Медиктерди саламаттык сактоо министри узатып, коронавирусту жеңип элди кубанткан жаңылык менен кайтышын каалады.
БИШКЕК, 30-мар. — Sputnik. Коронавирус жуктурган адамдар көп катталып жаткан Ош жана Жалал-Абад облустарына жардам берүү үчүн Бишкектен тогуз дарыгер жөнөп кетти.
Аларды саламаттык сактоо министри Космосбек Чолпонбаев узатып, ийгилик каалады.
"Мен сиздерге аябай ыраазымын, мындай оор кырдаалда бири-бирибизге жардам беришибиз керек. Азыркы учурда Жалал-Абад облусуна пульмонолог, реаниматолог, жугуштуу оорулар адиси аябай керек болуп жатат. Ал жактан өзүбүздүн болгон тажрыйбабызды, илим-билимибизди көрсөтөлү. Бардык шарттар түзүлгөн. Биздин дарыгерлер тарыхта чоң ийгиликтерди көрсөткөн, баарыбыз ушул коронавирусту жеңип элди кубантып, жүзүбүз жарык болуп жүрөлү. Бул саламаттыкты сактоо системасына да чоң сыноо болуп жатат", — деди министр.
Ошондой эле Чолпонбаев ал медиктерге кошумча маяна төлөнө турганын, акча өз убагында берилерин айтты.
Медиктерди узатуу иш-чарасы Саламаттык сактоо министрлигинин кеңсесинде болуп, "социалдык өкмөт" Facebook баракчасында онлайн көрсөтүлдү.
Дарыгерлер 14 күн бою изолятордо жаткандарды карап иштешет. Андан соң 14 күн өздөрү карантинге жаткырылат. Ошентип бир айдан кийин үйүнө кайтып келишет. Бригададагы дарыгерлердин басымдуу бөлүгү жаштар экени белгилүү болду.
Дарыгерлер менен кошо медициналык коргоочу каражаттарды жиберишти.
Бригададагы дарыгерлердин басымдуу бөлүгү жаштар экени белгилүү болду
Коронавирус Кыргызстанда
Кыргызстанда коронавируска кабылгандардын саны 84кө жетти. Алардын басымдуу бөлүгү Ош жана Жалал-Абад облустарында.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
