Сыноону бекем тартип менен жеңебиз! Президент Жээнбеков элге кайрылды

Жазылуу
Президент өлкөнүн бүткүл аймагына 22-марттан тарта өзгөчө кырдаал режими киргизилгенине карабай, эрежелерди бузган, тартипти сактабаган учурлар катталып жатканына токтолду.

БИШКЕК, 25-мар. — Sputnik. Президент Сооронбай Жээнбеков бүгүн, 25-мартта, өлкөнүн айрым шаарларында жана райондорунда өзгөчө абал режими киргизилгенине байланыштуу элге кайрылуу жасады. Бул тууралуу өлкө башчынын маалымат кызматы билдирди.

Президент өлкөнүн бүткүл аймагына 22-марттан тарта өзгөчө кырдаал режими киргизилгенине карабай, эрежелерди бузган, тартипти сактабаган учурлар катталып жатканына токтолду.

"Коронавирусту жайылтпоо үчүн мындан да катуу чараларды кабыл алуу зарылдыгы жаралды. Өлкөдөгү өзгөчө кырдаал жана аталган аймактардагы өзгөчө абал жашоо турмушубузда айрым ыӊгайсыздыкты, бир кыйла чектөөлөрдү жаратат. Мекендештерибизден тартипти темирдей бекем сактоо талап кылынат", — деди президент.

Өлкө башчы илдеттин мындан ары жайылып кетүүсүн болтурбоо максатында мамлекеттик органдар, жергиликтүү бийлик, дарыгерлер, чек ара жана милиция кызматкерлери күнү-түнү иштеп жатканына токтолду.

"Эпидемиологиялык кырдаалдын начарлоосуна жол бербей, өзгөчө кырдаалдын жана өзгөчө абалдын талаптарын кынтыксыз аткаруу алардын эмгегине чоң колдоо болот. Дүйнө жүзүндө вакцина табуу үчүн тынбай изилдөөлөр жүрүп жатат. Бирок азыр коронавируска каршы эффективдүү каражат — тартип, биримдик, санитардык-гигиеналык талаптарды так сактоо", — деп айтылат кайрылууда.

Өкмөт башчы Мухаммедкалый Абылгазиев  - Sputnik Кыргызстан
Вирус ар бирибиздин жаныбызда! Абылгазиевдин элге жасаган видеокайрылуусу
Президент чет өлкөдөн келгендерди, обсервацияда же дарыланууда жаткандарды өзүм билемдик кылбоого, илдетке чалдыккандар менен байланышта болгондорду издетпей, телефон аркылуу билдирүүгө чакырды.

"Бүгүнкү чоң сыноо келген күндөрү тартипти сактоо — ар бирибиздин атуулдук милдетибиз. Бул өзүңдүн гана эмес, мекендештериңдин, балдарыңдын ден соолугу, өмүрү, келечеги үчүн, жалпы коомдун саламаттыгы үчүн жоопкерчилик", — деди ал.

Мындан тышкары, Жээнбеков күнү-түнү оору менен алышып, элдин ден соолугуна кам көрүп жаткан ак халатчандарга ыраазычылык билдирип, алардын эмгеги жогору бааланарына токтолду.

Ошондой эле кичи жана чакан бизнес менен алектенген ишкерлерге өкмөт атайын алгоритм иштеп чыгарын, аларга жеңилдиктер каралганын эске калды.

Сөзүнүн аягында президент элдин башына түшкөн сыноону биримдик, бекем тартип менен гана жеңүүгө болорун баса белгиледи.

Жаңылыктар түрмөгү
0