БИШКЕК, 25-мар. — Sputnik. Жашоо үчүн маанилүү дары каражаттарын өлкөгө убактылуу мамлекеттик каттоосуз ташууга уруксат берилди. Тиешелүү чечимге премьер-министр Мухаммедкалый Абылгазиев кол койгонун өкмөттүн маалымат кызматынан билдиришти.
Бул чечим Кыргызстандын аймагында коронавирус инфекциясынын мындан ары жайылуусуна жол бербөө боюнча ыкчам чараларды көрүү, калкты дары каражаттары жана медициналык буюмдар менен камсыздоо максатында кабыл алынды.
Ал эми дары каражаттарын жана медициналык буюмдардын мамлекеттик жана расмий тилдерде таңгагынын маркалоосу жок болсо, кыргыз же орус тилине которулган стикер чапталуусу шарт.
Мындан тышкары, ушул токтомго ылайык, медициналык бет каптарды лицензиясы жана мамлекеттик каттоосу жок чыгарууга жана сатууга убактылуу уруксат берилди.
