БИШКЕК, 24-мар. — Sputnik. Кыргызстанда аскерге чакыруу токтотулду. Бул туурасында Коргоо иштери боюнча мамлекеттик комитеттин маалымат кызматынын жетекчиси Римма Даниярова билдирди.
Эске сала кетсек, мартта башталган чакыруу 31-майга чейин уланмак. Аскер кызматына 3000 кишини тартуу пландалган.
"Коронавирусту жайылтпоо эрежелерин сактоо үчүн жана өзгөчө кырдаал жарыялангандыгына байланыштуу аскерге чакыруу токтотулду. Абал турукташканга чейин Куралдуу күчтөргө кабыл алуу болбойт", — деди Даниярова.
Ал аскер бөлүктөрдө дезинфекциялоо иштери жүргүзүлүп, баарына маскалар таратылып жана бардык жерге дезинфекторлор коюлганын кошумчалады.
Эске салсак, коронавируска байланыштуу эртең Бишкек, Ош, Жалал-Абад шаарларына өзгөчө абал киргизилет. Соңку маалыматтарды Sputnik Кыргызстан агенттигинин тексттик трансляциясынан окуп туруңуздар.
