БИШКЕК, 15-май — Sputnik. ИИМдин жарлыгы менен 15-май ички иштер органдарында иштеп, кызмат учурунда каза болгондорду эскерүү күнү деп жарыяланды. Бул тууралуу министрликтин маалымат кызматы билдирди.
Ага ылайык, Кыргызстандын бардык аймактарындагы башкармалыктарда эскерүү иш-чаралары өтүп, маркумдардын туугандары, жесирлери, ички иштер органдарынын ардегерлери катышты.
Бишкек ШИИБдин жетекчиси Самат Курманкулов өз сөзүндө милиционерлердин кесиби жооптуу жана кооптуу экенин айтты.
"Күн сайын күнү, түнү дебей биздин кызматкерлер коомдук тартипти жана шаардын коопсуздугун камсыз кылууда өз өмүрлөрүн тобокелдикке салышат. Кылмыштуулук да күтүп отурбайт, биздин кесиптештер ар убак кызматка даяр", — деди ал.
ИИМдин мемориалдык тактасына 2015-жылы 19-ноябрда Бишкек шаарында кызмат учурунда кылмышкерлер тарабынан атып өлтүрүлгөн Актилек Абдувалиевдин ысымы жазылды. Маалыматта шаардык милиция түзүлгөн күндөн тарта 31 кызматкер иш учурунда каза болгону айтылат.
КР ИИМдин маалымат кызматы тараткан маалыматка ылайык, 1918-жылдан бери кыргыз милициясы өзүнүн эң мыкты 145 кызматкерин иш учурунда жоготкон.
