Аталган сайттын кызматын жөө жүргөндөр менен аларды көздөгөн жерине бекер жеткирип коюуну каалаган айдоочулар колдоно алат.
Студент Азалия Азатова Sputnik Кыргызстан агенттигинин редакциясына баш багып, сайтты ачууга эмне себеп болгонун жана кандай тоскоолдуктарга туш болгонун айтып берди.
—Азалия, алгач WhatsApp каналындагы "Попутка КГ" тобу жөнүндө айтып берсең, дагы деле активдүү иштеп жатабы?
— Ал башында түзүлгөндө абдан популярдуу болгон. Жүздөгөн адамдар кошулуп, телефондон башымды көтөрө албай калгам. Керели кечке ошол жактагы билдирүүлөрдү иреттеп, тартип бузуулар болуп кетпөөсүн карап отурчумун. Ишенсеңер, жай отуруп тамактанууга дагы убакыт тартыш болуп калган. Кийин эмнегедир басаңдай түштү. Азыр WhatsApp каналында үч, Telegram мессенжеринде бир тобум бар.
—Сайтты ачууга эмне түрткү болду?
— Мен "Попутка КГ" тобун түзгөндөн кийин бизден башка адамдар дагы ушул сыяктуу толгон-токой топторду түзүштү. Ар биринде 200-300дөн адам катталган. Менимче ошолордун баарын бир аянтчага жайгаштырсак, ишибиз жыйынтыктуурак болмок. Негизги максатым ушул.
—Эл сайтты кандай кабыл алды?
— Сайт эки күн мурун ишке кирди. Биринчи сааттардан баштап Бишкектен эле эмес, региондордон дагы билдирүүлөр түшө баштады. Демек, кимдир-бирөөлөргө чындап эле жардамы тиет окшойт деп жооруп койдум.
—Сайтты иштетүүгө ким жардам берип жатат?
— Сайтты кичинебизден бери чогуу өскөн курдашым акысыз жасап берди. Байкуш студентке жардам болсун деди окшойт. Азыр сайтты көзөмөлдөп турган командам бар. Алгач сайт эмес, мобилдик тиркеме түзүүнү ойлогом. Анткени колдонуучуларга ыңгайлуу болмок. Бирок ал өтө кымбат жана түйшүктүү иш экен. Аны укканда маанайым чөгүп, элирип алган жаным аябай жаман болдум. Бирок досум сайт жасайлы деп сунуштап калды.
—Жөө адам менен айдоочулар бири-бирин сайттар аркылуу издеши башка өлкөлөрдө эчак көнүмүшкө айланганы менен Кыргызстанда анча өнүгө элек. Биздин эл буга даяр бекен?
—Дүйнөнү автостоп менен кыдырган туристтер көп эмеспи. Алгачкылардан болуп сен баштаган иш Кыргызстандагы туризмди өнүктүрөт деп ишенесиңби?
— Мен жогоруда айткандай, буга биздин эл азырынча бир аз даяр эмес экен. Бирок, акырындык менен дүйнөлүк тренддерге кошулууга туура келет да.
—Кыргызстанда туулуп-өскөн Ольга Видишева АКШ бутиктеринин товарларын сатууга багытталган Shoptiques интернет долбоору менен айтылуу Forbes журналы аныктаган рейтингге илинген. Сенин дагы ушул сыяктуу амбицияларың болсо керек?
— Албетте көп нерсени кыялданам. Жакынкы келечекке пландарым бар. Алардын арасында социалдык эле эмес, өзүмө анча-мынча киреше алып келе турган долбоорлорду караштырып жатам. Азыр интернет, жаңы технологиялар менен абдан чоң иштерди жасаса болот. Келечекте менин атым дагы бир жерден угулуп калаар.
—Өсүп келе жаткан муундун өкүлү катары айтсаң, өлкөбүздү өнүктүрүүгө эмне жетишпей жатат?
