БИШКЕК, 9-апр. — Sputnik. Баткен облусунда классташтар бир чакырым жолду оңдошту. Бул тууралуу Sputnik Кыргызстан агенттигине демилгечилердин бири Кенжебек Салимбеков билдирди.
Маалыматка ылайык, Лейлек районунун Арка айылындагы классташтар бир чакырым жолдун аң-чөнөгүн оңдоо иштерин аткарышкан. Демилгени ишке ашыруу аракеттери эки күнгө созулуп, керектүү материалдарды алууга 20 миң сомдон ашык каражат сарпталган.
Кенжебек Салимбековдун айтымында, айылдын жолу начарлап кеткендиктен классташтар оңдоп коюуну эп көргөн.
"Жол жараксыз болуп калгандыктан классташтар оңдоп коюуну чечкенбиз. Эки күндөй эртеден кечке чейин иштедик. Цемент, шагылды акчага түшүртүп, керектүү жабдууларды ижарага алдык. Эл аябай ыраазы болуп калды", — деди ал.
Жолду оңдоо иштерине мектепте чогуу окуган 13 адам катышкан.
