БИШКЕК, 29-мар. — Sputnik. Кыргызстандын акыйкатчысы Кубат Оторбаев Бишкек шаардык ИИБдин кабыл алып бөлүштүрүү жайынын абалына мониторинг жүргүзүп кайтканын мекеменин маалымат кызматынан кабарлашты.
Билдирмеге караганда, акыйкатчы мониторинг жүргүзүү менен катар анда кармалып жаткан митингчилер, анын ичинде Садыр Жапаровдун уулу менен дагы баарлашкан.
"Мониторингдин алкагында ошол жерде жаткан ар бир жаран менен баарлашуу жүрүп юридикалык консультациялар берилди. Кубат Оторбаев Садыр Жапаровдун уулу Ренат Жапаровдун дагы ал-абалы менен таанышты. Жапаров учурда ден соолугу жакшырып калганын жана медициналык жардамга муктаж эместигин билдирди", — деп айтылат маалыматта.
"Кабыл алып бөлүштүрүү жайында 150 адам үчүн 26 камера бар. Бирок сегиз гана камера жарактуу болгондуктан бир камерада 10-15 адам кармалат. Вентиляция, канализация, санузел дегендер такыр иштебейт. Чатырынан суу өтөт. Коридорго жагымсыз жыт орногон, камераларды айтпай деле койсо болот", — деп белгиленет маалыматта.
Анда иштеген кызматкерлер күн ысыган маалда жагымсыз жыттын айынан дем алууга мүмкүн болбой каларын билдиришкен.
