БИШКЕК, 14-сен. — Sputnik. Дин таануучу Кадыр Маликовго кол салган Алибек Тилек уулунун өмүр бою абакка кесилген жазасы 20 жылга алмаштырылды. Бул тууралуу Жогорку соттун маалымат катчысы Айнура Токтошова Sputnik Кыргызстан агенттигине билдирди.
Маалыматка ылайык, Бишкек шаарынын жазык иштери боюнча соттук коллегиясы биринчи инстанциянын өкүмүн 29-августта өзгөрткөн.
Эскерте кетсек, 2015-жылы 26-ноябрда кечинде Бишкек шаарынын "Асанбай" кичи районунда теолог Кадыр Маликовго бейтааныш эки киши бычак менен кол салып, бетке жана моюнга сайып кетишкен. Маликов шаардык 4-оорукананын реанимация бөлүмүнө алып келинген. Милиция "Перехват" планын жарыялап, кылмышка шектүүлөрдү аныктаган.
Кол салгандар Түркияга чыгып кетүүгө үлгүргөн. Кийин алар Түркиядан Кыргызстанга экстрадицияланган.
2-июнда Бишкек шаарынын Биринчи Май райондук соту айыпталуучу Алибек Тилек уулуна карата өкүм чыгарып, аны өмүр бою абакка кескен болчу.
