БИШКЕК, 9-июн. — Sputnik. Белгилүү аалым, теолог Кадыр Маликовго кол салгандардын бири Алибек Тилек уулун Биринчи Май райондук соту өмүр бою эркинен ажыратуу өкүмүн чыгарды.
Эскерте кетсек, өткөн жылдын аяк ченинде Маликовго белгисиз эки киши кол салып, бетке жана моюнга сайып кетишкен. Маликов шаардык 4-оорукананын реанимация бөлүмүнө алып келинип, операция жасалган. Кийинчерээк кылмышка шектүү делгендер Түркиянын Газиантеп шаарынан кармалып, анын бири — Алибек Тилек уулу Кыргызстанга алып келинген.
Айыпталуучу светтик мамлекеттин мыйзамдарын тааныбай турганын, "Ислам мамлекети" террористтик уюму чыныгы исламды таратуучу уюм экенин, Маликовго анын ИМ тууралуу айткандарын токтотуу үчүн кол салганын айтты.
Ишти караган Биринчи Май райондук сотунун судьясы Мирлан Термечиков Алибек Тилек уулун күнөөлүү деп таап, Кылмыш жаза кодексинин 28-беренесинин (коомдук ишмердин өмүрүнө кол салуу) негизинде аны өмүр бою эркинен ажыратып, жазасын катуу режимдеги колонияда өтөө өкүмүн чыгарды.
