БИШКЕК, 25-авг. — Sputnik. Саясий партиялардын документин текшерген жумушчу топ Борбордук шайлоо комиссиясына (БШК) "Кыргызстан" партиясынын тапшырган документин кайра артка кайтарууну сунуштады.
Учурда БШК мүчөлөрү жана саясий партиялардын документин текшерген жумушчу топтун катышуусунда кеңейтилген жыйын өтүп жатат. Анда аталган топтун жетекчиси Абдыжапар Бекматов алдын ала текшерүүнүн жыйынтыгын чыгарды.
"Кыргызстан" партиясынын документтери толук эмес болгондуктан кайра артка кайтарууну БШКга сунуштайбыз", — деди Бекматов.
Ал эми "Кыргызстандын" ыйгарым укуктуу өкүлү кечээги жагдайдын жаралышына өзү ооруп калганы менен түшүндүрдү.
Ал эми БШК төрайымы Нуржан Шайлдабекова имараттын кире беришиндеги каттоо журналына "Кыргызстан" партиясынын өкүлүнүн колу коюлбагандыктан талаш жаралганын билдирди.
Алдыда эмне болот? Шайлоонун орчундуу даталары жана этаптары тууралуу маалымат
Саат 17.00дө БШК мүчөлөрүнүн дагы жыйыны болуп, жумушчу топтун сунушу ошондо каралат.
Белгилей кетсек, кечээ, 24-августта, саат 18.00гө чейин партиялар 5 миллион сомдук шайлоо күрөөсү менен талапкерлердин тизмесин тапшырышы керек эле. "Кыргызстан" партиясы саат 18.00 чамасында (так убактысы белгисиз) документин алып келген. Анда дагы кагаздары толук эмес болуп чыккан. Аталган партияны каттоого алып жатканын уккан башка партиялардын талапкерлери топтолуп БШКга келип, түндүн бир оокумуна чейин жагдайды териштирип, "Кыргызстанды" каттоодон четтетүүнү талап кылышкан.
Жогорку Кеңешти шайлоодо эл "баарына каршы" добуш берип салса эмне болот
Босогодогу видеобайкоону алып чыкканда документти 18.00дөн кийин алып келгени көрүнгөн. Бирок БШК видеобайкоонун убактысы бир аз алдыда экенин айтып жатат. Каттоо журналында партиянын өкүлдөрү саат 17.59да келгени жазылган. Бирок убакытты кайра өзгөртүп жазганы даана көрүнүп турат. Журналга партиянын өкүлүнүн колу коюлган эмес.
