БИШКЕК, 27-сен.— Sputnik. Өкмөттүн бүгүнкү отурумунда премьер Мухаммедкалый Абылгазиев өкмөт мүчөлөрүн элге туура маалымат жеткирүүгө чакырды.
Белгилей кетсек, 26-сентябрда Жогорку Кеңештин жалпы жыйынында "Кыргыз Республикасынын Социалдык фондунун 2018-жыл үчүн бюджетинин аткарылышы жөнүндө отчетун бекитүү тууралуу" мыйзам долбоору каралып жаткан учурда аталган мекеменин башчысы Медер Ирсалиев камсыздандыруу төлөмдөрүнүн чогулушу быйыл сегиз айдын жыйынтыгы менен 1 миллиард сомго кем болуп жатканын айткан болчу.
Депутат Дастан Бекешев 2018-жылы Соцфонддун бюджети боюнча көйгөйдүн бар-жогуна кызыккан. Ирсалиев эч маселе жок экенин, бирок быйыл бекитилген сумма чогулбай калуу коркунучу бар экенин айткан.
"Биз быйыл 1-январдан тарта Салык кызматына камсыздандыруу төгүмдөрүн чогултуу функциясын өткөрүп бергенбиз. Сегиз айдын жыйынтыгы боюнча азыр бир миллиард сом чогулбай жатат. Бул жерде коркунуч бар. Бирок Салык кызматынын төрагасы жыл аягына чейин бекитилген бюджетти толук чогултуп берем деп жатат. Эгер чогултуп берсе, коркунуч болбойт, ушул темп менен чогула турган болсо маселе жаралышы мүмкүн", — деди Ирсалиев.
Ал эми депутат Марлен Маматалиев Салык кызматы камсыздандыруу төлөмдөрүн чогулта албай жатса анын кедергиси пенсия төлөөгө тиер-тийбесин сураган. Ирсалиев эгер жагдай өзгөрбөсө, 2020-жылдын алгачкы эки айында пенсия кеч төлөнүп калышы мүмкүн экенин билдирген.
Өкмөттүн отурумунда Мухаммедкалый Абылгазиев Соцфонддун жетекчисинин Жогорку Кеңеште берген маалыматтарын сынга алды.
Эске салсак, Социалдык фондунун маалыматына ылайык, бүгүнкү күнү Кыргызстанда 667 миң пенсионер бар.
Биздин Telegram-каналга жазылыңыз.
