БИШКЕК, 2-авг. — Sputnik. КР президентинин аппарат жетечиси Сапар Исаков АКШнын Кыргызстандагы элчиси Шейла Гуолтнинин дипломатиялык миссиясынын аягына чыкканына байланыштуу аны менен жолукканын өлкө башчынын маалымат кызматынан билдиришти.
Ал Кыргызстанда 2015-жылдын сентябрь айынан баштап иштеп келген.
Азырынча Гуолтнинин ордуна ким элчи болуп келери белгисиз.
Исаковдун айтымында, Гуолтнинин иши натыйжалуу болгондуктан, өлкөнүн өнүгүшүнө жана эки мамлекеттин ортосундагы мамилелерди чыңдоого арналган бир катар долбоорлор ишке ашкан.
Ал эми элчи өз кезегинде АКШ менен Кыргызстандын 25 жыл ичиндеги өнөктөштүк тарыхы абдан бай экенин айтып, Америка Кыргызстандагы демократилык процесстерди ар дайым колдой турганын кошумчалады.
"Элчи айым келе жаткан президенттик шайлоо бийликти тынчтык жолу менен өткөрүп берүүнүн эң жакшы мисалы экенин дагы белгиледи", — деп айтылат билдирүүдө.
Ошондой эле жолугушуунун жүрүшүндө эки өлкөнүн тең кызыкчылыгын көздөгөн мындан аркы кызматташуулардын пландары жана жолдору талкууланды.
