БИШКЕК, 4-ноя. — Sputnik. Жекшемби күнү Кыргызстандын Россиядагы элчилигинде мигранттар менен эки өлкөнүн мамлекеттик органдарынын кызматкерлери чоң жыйын өткөрдү. Бул тууралуу элчиликтен кабарлашты.
Чогулушка диаспора жетекчилери, кыргызстандык таксисттер, спорт клубдардын, авиакассалардын өкүлдөрү жана КР менен РФнын ИИМ жана миграция кызматтарынан өкүлдөр катышты.
Иш-чаранын негизги максаты — Россия 16-октябрдан 10-декабрга чейин өткөрүп жаткан "миграциялык мунапыс" тууралуу түшүндүрүү иштерин жүргүзүү.
Ошондой эле кыргызстандыктар иштеткен кафе, ресторандарга кирип "миграциялык мунапыс" боюнча маалымат берүү сунушу каралды.
"Миграциялык мунапыс" 2018-жылдын 16-октябрынан 10-декабрына чейин уланат. Ал Россиянын аймагында миграциялык мыйзамдарды бузган кыргызстандыктар үчүн каралган. Аталган өлкөдө мыйзамсыз жашап, иштеп жүргөн КР жарандары бул аралыкта эч кандай тоскоолдуксуз жана жазасыз Россиянын аймагынан чыгууга жана каалаган мезгилде кайрадан кирип, өз миграциялык тарыхын таза баштоого укуктуу. Мындай жол менен алар "кара тизмеден" чыгарылат.
