БИШКЕК, 23-май — Sputnik. Ош шаарында такси айдап иштеген 31 жаштагы тургун киши колдуу болуп, анын сөөгүн өрттөп жиберишкен. Бул туурасында Ош ШИИБдин маалымат кызматы кабарлады.
Билдирмеге караганда, маркум 13-май күнү Daewoo Matiz үлгүсүндөгү жеке унаасы менен такси кызматын көрсөтүү үчүн үйдөн чыгып кеткен бойдон кайрылып келген эмес. Анын сөөгү 23-майга караган түнү Кара-Суу районунун Каратай айылынан алыс эмес жердеги ээн талаада табылды. Ал кылмышкерлер тарабынан өрттөлгөнү айтылат.
"Ош шаардык милициясы ИИМдин криминалдык милиция башкы башкармалыгынын кызматкерлери менен чогуу кылмышка шектүү изин жашырууга аракет кылып кыргыз-казак чек арасынан өтүп бара жатканда кармады. Ал 28 жаштагы Кара-Суу районунун жашоочусу болгон. Берген көрсөтмөсү боюнча маркумдун автомашинасы Токмок шаарынан табылды. Шектүү таксистке унаасын тартып алуу үчүн кол салган. Андан соң кылмышын жашыруу максатында сөөгүн өрттөп жиберген", — деп айтылат маалыматта.
Учурда бул факты боюнча тергөө амалдары жүрүп жатат. Кылмыш жасоого тиешеси бар болушу мүмкүн делген башка адамдар да иликтенүүдө.
