БИШКЕК, 30-апр. — Sputnik. Өзгөндүн Аюу айылындагы жер көчкү алдында калган дагы бир кыздын сөөгү табылганын ӨКМ билдирди.
Маалыматка ылайык, маркум 20 жаштагы жаран экени белгилүү болду. Сөөк саат 17.40тар чамасында табылган.
Эскерте кетсек, 29-апрелде эртең менен саат 6:40тар чамасында Өзгөн районун Зергер айыл аймагындагы Аюу айылында көлөмү 200 миң метр куб жер көчкү жүрүп, алдын ала маалымат боюнча алты үй-бүлөдөн 24 кишини басып калган. Көчкү алдында калган жети турак жайдын бирөөндө эч ким жашаган эмес.
Издөө иштери бүгүн да саат 10.50дө башталып, ага 400 адам тартылган. Адистердин айтымында, көчкүнүн бийиктиги болжол менен 4,5-5 метрди түзөт.
Буга чейин саат 14.15те 2 жана 12 жаштагы эки кыздын сөөгү табылган.
