БИШКЕК, 22-апр. — Sputnik. Кызыл китепке кирип коргоого алынган кулжаны эки улан бийиктике туруп, таш менен бир нече ирет ургулап, кулата чапкан видео социалдык тармактарга тарап, кызуу талкууга алынууда.
Видеодо эки жакка кете албай, алдынан ит камап, артынан аскага такалып калган аркарды эки бала мыкаачылык менен ташка алып жатканын көрүүгө болот. Алар жогору жакта туруп, улам-улам миздүү таштар менен мээлеп урганда кулжанын башына тийип жаныбар кулап түшкөн. Андан соң аны арсылдап үрүп жаткан иттер басып калганда, кубанган балдар, бул кылыгына маашырланып, жардамсыз жандыкка карай чуркап баратканы видеого тартылган.
