БИШКЕК, 13-окт. — Sputnik. Үстүбүздөгү жылдын 31-августуна карата Кыргызстандын мамлекеттик карызы 4 миллиард 469,22 миллион АКШ долларын түздү. Кыргыз валютасына которгондо 311 миллиард 980,73 миллион сом болот. Бул туурасында Финансы министрлигинен билдиришти.
Анын ичинен тышкы карыз — 3 миллиард 761,91 миллион доллар (262 миллиард 605,42 миллион сом), ички карыз — 707,32 миллион доллар (49 миллиард 375,31 миллион сом).
Соңку маалыматка караганда, Кыргызстандын тышкы карызы азайып, ички карызы өскөн. 30-июлга карата берилген статистикада өлкөнүн жалпы карызы 4 миллиард 454 миллион доллар болчу. Бир айда бул сумма 15 миллион долларга көбөйгөнү байкалат.
Бирок тышкы карыз 5,91 миллион долларга азайган, деген менен ички карыздын суммасы 20,8 миллион долларга жогорулаган.
