БИШКЕК, 17-дек. — Sputnik. Борбор калаага автобус сатып алуу үчүн өткөн тендердин жеңүүчүсү кытайлык ZHENGZHOU YUTONGBUS CO., LTD компаниясында Бажы биримдигинин сертификаты бар. Бул тууралуу мэриянын маалымат кызматы билдирди.
Тендерде 301 миллион 273 миң 700 сом сунуштаган кытайлык Znengzhou yutongbus CO., LTD корпорациясы жеңген.
Анын өндүрүшү дүйнөлүк көлөмдүн 15 пайызын түзүп, завод күнүнө 730, жылына 750 миң автобус чыгара алат. Ошентип Бишкекке Yutong ZK 6108 HGH үлгүсүндөгү жаратылыш газы менен иштеген автобустар алып келинет.
"Yutong ZK 6108 HGH автобустары газ менен иштейт. Учурда бир кубометр газдын баасы 19,5 сом болсо, дизель майынын баасы 46,5 сом. Тажрыйба көрсөткөндөй, газ менен иштеген техникада үнөмдөө болуп, абага чыккан уулуу газдар 50 пайыздан ашык көлөмдө кыскарат. Бул өз кезегинде Бишкектин экологиясына жакшы таасир берет. Аталган компаниянын автобустары азыр Алматыда, Монголияда, Гаванада жана Бангкок сыяктуу бир катар жерлерде колдонулуп жатат", — деп айтылат маалыматта.
Кытай компаниясынын дагы бир артыкчылыгы — автобустарга төлөнө турчу каражаттын 90 пайызы алар Кыргызстанга алынып келгенден кийин берилет. Бардык документтерге кол коюлгандан кийин транспорт 60-90 күндүн ичинде келет. Бир автобустун баасы 72 миң доллар турат.
"Тендердин жыйынтыгында үнөмдөлгөн каражатка кошумча 9 автобус сатып алынууда. Жалпысынан Бишкекте жаңы 69 автобус каттап калат", — деп айтылат билдирүүдө.
Автобустарды сатып алуу үчүн каражат быйылкы жылдын бюджетине киргизилген.
