СССРдин эл артисти, театр жана кино жылдызы Муратбек Рыскулов менен Кыргыз Республикасынын Эл баатыры Сабира Күмүшалиеванын уулу Искендер, Бактыбек жана кызы Нуржамалдын сүрөтү 1950-жылдардын соңунда тартылган.
Чыгармачыл инсандар чогуу 38 жыл өмүр кечирип, төрт баланы тарбиялап өстүргөн.
Ошол учурду кызы Нуржамал Рыскулова мындайча эскерет.
"Бизди ата-энебиз жакшы тарбиялады. Баарыбыз окуп, жогорку билимге ээ болдук. Алар негедир биздин чыгармачылык менен кетүүбүзгө каршы болушчу. Атам менен апам эч качан биздин көзүбүзчө катуу урушчу эмес. Мен да ата-энем такыр урушпайт деп ойлоп жүрчүмүн. Кийин атамдын айдоочусуна кезигип калып, ал киши айтып калды. Көрсө, алар балдарына үлгү бололу деп атайын унааны айдатып шаардын четине, Кызыл-Аскер жакка барып урушуп алып, эч нерсе болбогондой кайра үйүгө кирип келишчү экен", — деди Нуржамал Рыскулова.
Өмүрүн чыгармачылыкка арнаган Муратбек Рыскулов 20га жакын тасмада, 40тай спектаклде роль аткарган. Ал эми Сабира Күмүшалиева 70 жылдан ашык театр, кинодо эмгектенип, 100дөн ашык түрдүү образдарды жараткан.
