БИШКЕК, 1-апр. — Sputnik. Тайлак баатыр жөнүндө тартыла турган эки сериялуу тарыхый көркөм тасманы коё турган режиссерго сынак жарыяланды. Бул туурасында Маданият, маалымат жана туризм министрлигинин маалымат кызматынан кабарлашты.
Тасманы тартуу сынагына катышуучулар арызын бүгүнтөн тарта 20-апрелге чейин жөнөтсө болот.
Конкурска Кыргызстандын жараны болгон тажрыйбалуу режиссерлор жалгыздап же өзүнүн чыгармачыл тобу менен катышса болот.
Маалыматта конкурска катышуучулардын бардыгы "Тайлак баатыр" тарыхый тасмасынын сценарийи менен тааныша тургандыгы айтылат. Келечектеги бул тасманын сценарийин Садык Шер-Нияз, Каныбек Иманалиев жана Бакыт Турдубаев жазган.
Тайлак Рыскул уулу азыркы Ак-Талаа жана Тогуз-Торо райондорунун чегинде, Куртка деп аталган аймакта туулуп-жашап өткөн кыргыз элинин баатырларынын бири. Аны болжол менен 1796-жылдары жарыкка келип, 1838-жылдары каза болгон деп айтып келишет. XIX кылымдын биринчи жарымындагы кыргыз элинин көз карандысыздык үчүн болгон кыймылынын ири ѳкүлү.
