БИШКЕК, 3-май — Sputnik. Курулуш министрлиги аталган тармактагы бардык субъектилерди белгиленген талаптарды так сактоого чакырып, ал эми мыйзам бузуулар болсо дароо билдирүү керектигин айтып, элге кайрылды.
Имараттарды, объектилерди салып жатканда тиешелүү талаптар жана эрежелер бузулган учурда мыйзам чегинде чаралар көрүлөрүн эскертти.
"Урматтуу жарандар! Эгер курулуш объектилериндеги мыйзам бузууларга күбө болсоңуз, сүрөткө, видеого тартып Мамлекеттик курулуш көзөмөл департаментинин (0221) 328-256 WhatsApp номерине жөнөтсөңүз болот", — деп министрликтен кайрылышты.
Жакында эле көп кабат үй салып жаткан компанияга курулуштан чыккан таштандыны ыргытканы үчүн эскертүү берилди. Ал жерге барган Бишкек шаардык архитектура-курулуш көзөмөлдөө башкармалыгынын адистери талаптар жана мыйзамдык ченемдер сакталбагандыгын аныктаган.
Видео №4 шаардык ооруканага жакын жерде тартылган. Анын кесепетинен айланага чаң, кир тарап жатканын көрүүгө болот.