БИШКЕК, 12-апр. – Sputnik. Украин аскерлери пасхалык элдешүүнү бузган учурлары эки миңге чукулдап барды. Бул туурасында Россиянын Коргонуу министрлиги билдиргенин РИА Новости жазды.
"11-апрелде 16:00дөн 12-апрель саат 8:00гө чейинки аралыкта Украинанын Куралдуу күчтөрүнүн бөлүктөрү тарабынан ок атышууну токтотуу тартибин бузган 1 971 учур катталды", — деп мекемеден билдиришти.
Түндө украин аскерлери Днепропетровск облусундагы Покровское аймагы тараптан орус позицияларына үч жолу чабуул жасап, бирок максатына жете алган жок. Ошондой эле жоокерлер Сумы облусунда жана ДЭРде каршылаштын алдыга жылууга төрт ирет жасаган аракетинин мизин кайтарышканы айтылды.
Жалпысынан Украинанын Куралдуу күчтөрү чек ара аймактарын жана россиялык аскерлер турган жерлерди 258 жолу аткылап, FPV-дрондор менен 1 329 чабуул жасаган. Курск жана Белгород облустарында бир нече жай тургун, анын ичинде бир бала жабыркаган.
Министрлик Россиянын армиясы ок атышууну токтотуу тартибин так сактап жатканын баса белгиледи.
РФ президенти Владимир Путин жарыялаган пасхалык ок атышпоо макулдашуусу жекшемби бүткөндө аяктайт. Москва Киев да бул кадамды колдоп, атышууну токтотот деген ишенимде болчу. Аскерлерге каршылаш тараптан болушу мүмкүн болгон чагымдарды алдын алууга даяр туруу тапшырылган.
Россия былтыр да Пасха майрамына карата ок атышпоону жарыялап, аны Украина кабыл алгандыгы айтылган. Ал мөөнөт аяктагандан кийин Коргоону министрлиги Украинанын Куралдуу күчтөрү макулдашууну бузган 4900дөн ашык учур катталганын билдирген.