БИШКЕК, 12-апр. — Sputnik. Вашингтон менен Тегеран алардын мамилеси боюнча Пакистандагы сүйлөшүүдө толугу менен кепке келе алган жок. Бул туурасында РИА Новости жазды.
АКШнын вице-президенти Жей Ди Вэнс алардын делегациясы Иран менен бир пикирге келе албай өлкөсүнө кайтып баратканын билдирди.
"Исламабаддагы сүйлөшүүлөрдүн жыйынтыгында келишим түзө албай, АКШга кайтып жатабыз", — деп билдирген журналисттерге.
Саясатчынын айтымында, Кошмо Штаттар өзүнүн маанилүү чектерин жана кайсы маселелерде мунасага келсе болорун белгилеген. Ошону менен бирге Вашингтондун сунушу акыркысы жана эң ыңгайлуусу болчу деген.
"Буга карабастан Иран сунушталган демилгелерге макул болгон жок", — деп кошумчалады ал.
Вице-президенттин пикиринде, келишимдин жоктугу Вашингтонго караганда Тегеран үчүн жаманыраак болот.
Жолугушуу кечээ Пакистандын борборунда өттү.
Ал арада Ирандын Тышкы иштер министрлигинин расмий өкүлү АКШ менен бир катар маселелер боюнча алар өз ара түшүнүшүүгө жеткенин, бирок 2-3 маанилүү маселеде пикирлери келишпей калганын айтты.
"Ошол себептен келишим түзүлгөн жок", — деп билдирген расмий өкүл.
Ал ошондой эле сүйлөшүүлөр ишенбестик маанайда өткөнүн жана келишим бир эле жолугушууда түзүлөрүн буга чейин деле эч ким күтпөгөнүн айтты.
АКШнын делегациясынын курамына Вэнс, АКШ президентинин атайын чабарманы Стивен Уиткофф жана Ак үйдүн башчысынын күйөө баласы Жаред Кушнер кирди. Иран тараптан парламенттин төрагасы Мохаммад-Багер Галибаф жана тышкы иштер министри Аббас Аракчи катышкан.
Reuters агенттигинин маалыматы боюнча, тараптар Ормуз кысыгы, өзөктүк куралдар тематикасын, репарацияларды, санкцияларды жана жаңжалды токтотуу маселелерин талкуулады.