БИШКЕК, 22-мар. — Sputnik. Мамлекеттик салык кызматынын өзгөчө салык режимдерин көзөмөлдөө бөлүмүнүн инспектору 20 миң доллар өлчөмүндө пара талап кылууга шектелип кармалганын УКМК билдирди.
© Фото / пресс-служба ГКНБ КР
Маалыматта жооптуу кызматкер ишкерлердин бирин салыктык текшерүү жүргүзөм деп коркутканы айтылат.
"Инспектор 19-мартта Аламүдүн районунун Көк-Жар айылында жүргүзүлгөн иш-чаралардын натыйжасында 5 миң доллар өлчөмүндө пара алып жаткан жеринен колго түшүрүлдү. Кылмыш-жазак кодексинин 96-беренесине ылайык, шектүү УКМКнын убактылуу кармоочу жайына киргизилди", — деп жазылат кабарда.
Учурда УКМК тарабынан бул ишке тиешеси бар башка кызмат адамдарын аныктоо боюнча ыкчам-иликтөө иш-чаралары жүргүзүлүүдө.