Азапты адам өз башына өзү үйүп алат турбайбы. Кечээки чыккан маалыматтарды тизмектеп отуруп, көзүмө "Ислам мамлекети" террордук уюумунун үгүтчүлөрүнүн кылтагына илинген 21 жаштагы кыз тууралуу маалымат урунду. Окуп отурсам, кыргызстандык кыз согуш болуп жаткан жерде курал-жарак колдонгонду үйрөнүп, экстремисттердин катарына кошулуп, атургай курбусун да ал жакка чакырууга аракет жасаптыр. Тынч жаткан жеринен согушка барып эмне азап дейм да. Айтуу кыйын… Экстремисттердин катарында жүргөн кыз эми Кыргызстанда, бирок абакта эмес. Сирияда жүргөндө жердешин жолуктуруп, боюна бүтүп, азыр ымыркайы кичинекей экен. Ушундай жашоо…
Бул өткөн айдагы төбө чачты тик тургузган сегиз соттук чечимдин бири эле. Энесин өлтүрүп коюп өзү түнкү клубда эс алып жүргөн баланын, аялына акчасын уурдаткан күйөөнүн баяндарын окусаңар жакаңарды кармайсыңар.
Айтып оозду жыйгыча, өздөрүн "Ислам мамлекети" террордук уюумунун өкүлдөрүбүз" деп атаган белгисиз адамдар Бишкекте теракт уюштурабыз деп шаар бийлигине ультиматум коюптур.
Көйгөй түгөнбөйт тура. Бири бүтсө, экинчиси башталып. Саясат тармагында деле ошондой көрүнүш. Азыр коомчулук арасында Атамбаев менен Жээнбековдун мамилеси кызуу талкууда. Билгени деле, билбегени деле окшоштуруп божомолдоп жатат. Экс-президент менен азыркы мамлекет башчысынын ортосундагы мамилеге кабарчыбыз Бегимай Бакашева саресеп салып көрдү.
Ал ортодо улам бир кызматтын башчысы жумушунан кол жууп, жаңысы дайындалууда.
Саясат эч кимге ден-соолук же пайда алып келбейт. Андан көрө "Ала-Арчада" өткөн марафон сыяктуу спорттук иш-чараларга катышкыла.
Валюта наркы. Сомдун баасы долларга карата орто эсеп менен 68.79 (сатып алуу) жана 69.07 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү май 42.80 сом, АИ-95 үлгүсүндөгү бензин 45.50 сом, ал эми дизель майы 42.50 сомдон сатылууда.
Соңку сөз. Жакшы күндөр көп болсун!
Аманчылык каалап, Таалайгүл Усенбаева