Бүгүнкү күндө англис тилдүү мугалимдерге талап күч болгондуктан, Ишеналы Арабаев атындагы Кыргыз мамлекеттик университети да бул жылы англис тилдүү тайпаларды ачууну максат кылууда. Бул тууралуу Төлөбек Абдрахманов Sputnik Кыргызстан радиосунун таңкы эфиринде маек куруп жатып билдирди.
Анын айтымында, мындай группаларда каалоочулар окумакчы.
"Студент эгер эл аралык компанияларда же чет мамлекеттерде иштегиси келсе, өзүнүн каалоосу менен англис тилдүү тайпадан билим алса болот. Учурда англис тилин билген мугалимдерге талап күч. Сунуштар көп келип, бирок биз алардын талаптарына жооп берген бүтүрүүчүлөрдү чыгара албай калып жатабыз. Ошондуктан жаңы окуу жылынан баштап атайын англис тилдүү группаларды ачабыз. Бул - пилоттук долбоор. Жакшы иштеп кетсе кыргыз балдары чет жерде сабак берип, мугалимдик кесипти аракаласа эмнеге болбосун?" — деди ректор.
Ал ошондой эле аталган окуу жай Казакстан, Кытай, Корея жана Россиянын университеттери менен тыгыз кызматташып келерин кошумчалады.
