Атыканов: февралда Бишкекке 52 троллейбус алып келинет

2018-жылдын февраль айында Бишкекке 52 троллейбус алып келинет. Бул тууралуу Бишкек мэриясынын шаардык транспорт башкармалыгынын башчысынын орун басары Нурлан Атыканов Sputnik Кыргызстан радиосуна маек куруп жатып билдирди.

Анын айтымында, троллейбустар келсе жаңы каттамдар ачылат.

"2014-2015-жылдары шаарга 79 троллейбус алып келинген. Учурда тогуз каттам боюнча 110 троллейбус элди тейлеп жатат. Буюрса дагы 52 троллейбус алганы жатабыз. Бардык документтерге кол коюлду", — деди Атыканов.

Ал жаңы троллейбустар февралдан тарта элди тейлеп каларын кошумчалады.