БИШКЕК, 13-окт. — Sputnik. Кыргызгидромет 14-октябрдан 20-октябрга чейин өлкө аймагында кандай аба ырайы болоору тууралуу маалымат таратты.
Ага ылайык, 14-октябрда көпчүлүк аймактарда мезгил-мезгили менен жаан жаап, Чүй, Талас өрөөндөрүндө жаан карга айланат. Тоо этектерине жана тоолуу райондорго кар жаайт. Чүй, Талас, Ош, Жалал-Абад, Баткен облустарынын тоо этектеринде жана тоолуу райондордо туман түшөт. Батыштан соккон шамалдын ылдамдыгы секундасына 3-8 метрден, Ысык-Көл, Нарын облустарында 15-20 метрге чейин жетиши мүмкүн.
14-октябрда түндө Чүй менен Таласта 0…6 градус жылуу болсо, күндүз 2…7 градуска жетет. Ош, Жалал-Абад жана Баткен облустарында түндө 2…7 градус жылуу болсо, күндүз 10…15 градус жылуу болот. Нарын менен Ысык-Көл облустарында түңкүсүн 3 градуска чейин суук болуп, күндүз 5…15 градуска чейин жылыйт.
Түндө Чүй облусунда 1…6 градус жылуу болсо, күндүз 7…12 градуска дейре жылыйт. Таласта түндө 1…3 градуска чейин суук болуп, күндүз 6…11 градуска чейин жылуу болот. Ош, Жалал-Абад жана Баткен облустарынын дыйканчылык аймактарында түндө 2…7 градус жылуу болуп, күндүз күндүн табы 11…16 градуска чейин көтөрүлөт. Ысык-Көлдө түндө 1…6 градус жылуу болуп, күндүз 12…17 градуска чейин жогорулайт. Ал эми нарында түндө 3 градус сууктан 2 градуска чейин жылуу болуп, күндүз 12…17 градуска жылыйт.
16-октябрда мезгил-мезгили менен жаан жаап, Чүй, Талас өрөөндөрүндө жаан карга айланат. Ош, Жалал-Абад, Баткен облустарынын тоо этектеринде жана тоолуу райондордо туман түшүшү мүмкүн. Батыштан соккон шамалдын ылдамдыгы секундасына 4-9 метрден, 15-20 метрге дейре жетиши ыктымал.
17-октябрда көпчүлүк аймактарда жаан, кар катуу жаашы мүмкүн. Түндүк-батыштан соккон шамалдын ылдамдыгы секундасына 5-10 метрден, кээ бир райондордо 18-23 метрге чейин жетиши болжонууда.
18-октябрда Ысык-Көл, Нарын облустарынын айрым жерлеринде жамгыр жаашы мүмкүн, калган аймактарда жаан-чачын күтүлбөйт. Түндүк-батыштан соккон шамалдын ылдамдыгы секундасына 5-10 метрге дейре жетет.
Ал эми 19-20-октябрда өлкө аймагында жаан-чачын күтүлбөйт. Абанын температурасы өзгөрүлүп турат.
