Быйыл кыргызстандыктардын капчыгын кампайтып, чыгашасын көбөйтө турган жагдайлар
15:17 06.01.2026 (Жаңыртылды: 16:37 10.01.2026)
© Sputnik / Жоомарт Ураимов
Жазылуу
БИШКЕК, 6-янв. — Sputnik. 2026-жылы жарандардын кайсы категориясынын кирешеси көбөйүп, чыгашасы өсөрүн тизмектедик.
Негизги жаңылык төмөнкүлөр:
бийик тоолуу аймактарда жашагандар үчүн жөлөк пул төлөнө баштайт. Ар бир үй-бүлө ай сайын үчүнчү баладан баштап (3 жашка чейин) 3 миң сомдон алат;
1-апрелден тарта дарыгер, мугалим, методист жана социалдык кызматкерлердин айлык акысы көтөрүлөт. Айрымдардыкы эки эсеге чейин өсүшү күтүлүүдө. 1-сентябрдан тарта бир катар бюджеттик кызматкерлердин айлыгы көбөйөт;
октябрда пенсиялар сезилерлик жогорулайт. Бирок бийлик так сумманы айткан жок;
1-майдан тарта электр энергиясына тариф көтөрүлөт. Маселен, калк үчүн 1 киловатт-сааттын баасы 1,64 сом (+27 тыйын) болот;
1-январдан баштап кафе жана ресторандарда тейлөө акысы, тамак берүү жана башка кошумча кызматтар үчүн төлөм алууга тыюу салынды. Бардык кызматтар менюда көрсөтүлгөн баага төп келиши керек;
Жогорку Кеңеш бизнеске жана жарандарга бир катар жеңилдиктерди караган мыйзам долбоорун кабыл алды. Анын ичинде автоунаа алып-саткандарды салыктан бошотуу жана тигүүчүлөр үчүн төлөмдөрдү азайтуу каралган;
Быйыл Кыргызстан 15 миң электромобиль жана “гибрид” унааларды бажы алымысыз импорттой алат. Бул норма 22-январдан тарта күчүнө кирет.
