Эксперт Бишкектеги тыгын көйгөйүн чечүү жолдорун сунуштады
13:55 18.09.2025 (Жаңыртылды: 14:29 18.09.2025)
© Sputnik / Михаил Дудин
Жазылуу
БИШКЕК, 18-сен. — Sputnik. Бишкектин тыгын көйгөйүн чечүүдө мажбурлап, таңуулагандын ордуна альтернатива сунуштаган дурус. Бул тууралуу Россиядагы Шаар курулушун илимий-изилдөө институтунун транспорттук инфратүзүм багытынын жетекчиси Александр Баранов Sputnik Кыргызстан радиосунун эфиринде билдирди.
Анын айтымында, Россиядан келген адистер Бишкектин 2050-жылга чейинки башкы планын иштеп чыгуу алкагында транспорт көйгөйлөрүн чечүү боюнча кыргызстандык кесиптештери менен тыгыз кызматташып жатышат.
Борбордун тыгын көйгөйүн чечүү боюнча негизги сунуштар:
тез жүргөн экспресс-маршруттар жана коомдук транспорт үчүн атайын тилкелер керек. Борбордун чыгышы менен батышын байланыштырууда кадимки транспортко альтернатива болушу үчүн шаар ичиндеги транспорттук тармакка темир жолду интеграциялоо зарыл;
велосипед толук кандуу транспорт катары колдонулушу шарт. Ал үчүн шаарды толук айланып, бири-бирине байланышкан маршруттарды түзүү керек. Самокат айдаган адамдар үчүн өзүнчө тилке зарыл, анткени самокаттар оор жана жөө адамдар үчүн кооптуу;
шаардын борборун унаа жүктөмүнөн арылтып, айланма маршруттар түзүлгөнү дурус. Мисалы, шаардын түндүк райондору борбордук бөлүккө кирбей эле базарларга же аэропортко чейин кетсе боло тургандай болушу керек. Азыр бардык каттамдар борбор аркылуу жүрөт;
келечектеги башкы планда туюк көчөлөрдү ачуу жана магистралдык жолдорду кеңейтүү каралууда.
"Россиялык адистерге тар убакыт берилген. Ага карабай артыкчылыктуу багыттар аныкталды. Транспорт агымын бөлүштүрүү, жаңы маршруттарды түзүү боюнча анализ жасадык. Негизи шаар тургундары үчүн А чекитинен Б чекитине жетүүнүн бир нече жолу болушу керек. Тыгында калгың келсе автоунаа айда, тезирээк жеткиң келсе автобуска же велосипедге отура калсаң болот дегендей тандоо болушу керек", — деп белгилеген Баранов.
Ал бардык жол кыймылынын катышуучуларынын кызыкчылыктарын бирдей камтуу үчүн кеңири талдоо жүргүзүлүп жатканын айткан.
