РФтин Тергөө комитети: "Крокустагы" теракт Киев бийлигинин кызыкчылыгын көздөгөн
21:45 23.06.2025 (Жаңыртылды: 09:08 24.06.2025)
© Sputnik / Григорий Сысоев
/ Жазылуу
БИШКЕК, 23-июнь — Sputnik. "Крокус Сити Холлдогу" теракт Украина бийлигинин кызыкчылыгы үчүн даярдалып, Россиядагы саясий кырдалды курчутуу үчүн уюштурулган. Бул тууралуу ведомствонун сайтында жарыяланган.
"Тергөө аныктагандай, бул ырайымсыз кылмыш азыркы Украина жетекчилигинин кызыкчылыгы үчүн даярдалып, биздин өлкөдө саясий туруксуздукту жаратуу максатын көздөгөн. Мындан тышкары, айрым айыпталуучулар Дагестандын Каспийск шаарындагы көңүл ачуучу жайды жардырууну да пландашкан. Бирок бул кылмышты алдын алууга мүмкүн болду", — деп билдиришти Тергөө комитетинен.
Урунттуу учурлар:
терактыга даярдык бир нече ай мурда башталган, айрым куралчан адамдар чет өлкөдөн келип, ал жакта баштапкы даярдыктан өтүшкөн;
шектүүлөр Россиянын ичинде курал издеп, аны жасалмалап, Дагестандын Каспийск шаарында, кийин Подмосковьеде сакташкан;
терактыны түздөн-түз жасагандар — Россияда тыюу салынган "Вилаят Хорасан" террордук уюмунун мүчөлөрү жана алардын жардамчылары болгон. Жалпы жонунан бул иш боюнча 19 адам айыпталууда;
айрым шектүүлөр курал жасалмалап, террорчуларга өткөрүп берген. Алар курал кайсы максатта колдонуларын билишкен;
согушкерлерге, жардамчыларына жана курал менен камсыздаган адамдарга теракт уюштуруу, жардам көрсөтүү жана мыйзамсыз курал жасоо беренелери боюнча айып тагылууда;
терактыдан кийин кылмышкерлер Украинага качып кетүүгө аракет кылган, бирок Брянск облусунан кармалып, Москвага жеткирилген. Уюштуруучулар жардамчыларына өлкөдөн чыгып кетүүнү буюрган, бирок алар чек арадан өтүүгө аракет кылып жатканда кармалган;
терактыдан 149 адам каза болуп, бирөө дайынсыз жоголгон, 609 киши жаракат алган. Жалпы келтирилген зыян 6 миллиард рублге жакын деп бааланууда.
2025-жылдын 22-мартында Москва облусунун Красногорск шаарындагы "Крокус Сити Холл" концерттик залында куралдуу кол салуу болуп, террорчулар автоматтан элге ок жаадырып, андан соң залга от коюшкан.
