Былтыр мамлекеттик-жеке өнөктөштүк жаатында кол коюлган макулдашуулар
© Sputnik / Асель Сыдыкова
Жазылуу
Мамлекеттик-жеке өнөктөштүк борборунун улук эксперти Эрденет Касымов аталган борбордун 2023-жыл ичинде аткарган иштери тууралуу айтып берди.
2023-жыл Мамлекеттик-жеке өнөктөштүк борбору үчүн жемиштүү жылдардан болду. Жалпысынан жети мамлекет менен кызматташуу жаатында бир миллиард сомдон ашык макулдашууга кол коюлду. Бул тууралуу Эрденет Касымов Sputnik Кыргызстан радиосунун эфиринде маек куруп жатып билдирди.
Былтыр мамлекеттик-жеке өнөктөштүк жаатында кол коюлган макулдашуулар
Анын айтымында, МЖӨ — мамлекеттик кызматтарды сапаттуу көрсөтүүгө жана инфраструктураны өркүндөтүүгө мүмкүндүк берген альтернативдүү ыкма.
"Макулдашуунун жыйынтыгында №69 мектеп-гимназиясынын бассейнин реконструкциялоо, Бишкек шаарынын аймагына заманбап базар куруу, Оштогу муниципалдык "Жылуулук камсыздоо" ишканасынын от казанын реконструкциялоо, Бишкек, Жалал-Абад облусундагы саламаттык сактоо уюмдарына дистанциялык литотрипсия жабдууларын орнотуу, Кыргызстандын Эл аралык университетинин корпустарын модернизациялоо, Чүй облустук ооруканасын оӊдоодон өткөрүү жана "Кыргыз почтасынын" Жалал-Абаддагы филиалын реконструкциялоо иштери аткарылмай болду. Андан тышкары, өткөн жылдын 28-29-сентябрында Бишкекте мамлекеттик-жеке өнөктөштүк боюнча II эл аралык конференция болуп өттү. Иш-чаранын жыйынтыгында Азия өнүктүрүү банкы менен маалыматтарды иштеп чыгуу борборун (баасы 10 миң доллар) түзүү макулдашуусуна кол коюлду. Ошону менен бирге 60 миллион доллар турган шамал электр станциясын курууга жардам берет. Учурда эл аралык финансы корпорациясынын көмөгү менен 100-150 мегаватт кубаттуулуктагы күн электр борборун куруу боюнча ири долбоор аяктады. Жакында конкурс жарыяланат. Алматы — Бишкек жолун салуу боюнча долбоордун укуктук-финансылык талдоолору соӊуна чыкты. Жыл аягында Ош облусунун Өзгөн шаарына айланма жол куруу жана тейлөө боюнча техникалык-экономикалык негиздемеси даяр болду. Бишкек — Күнтуу — Белогорка — Суусамыр унаа жолунун курулушу боюнча Евразия өнүктүрүү банкы менен макулдашылды", — деди Касымов.
Ал 2021-жылдан бери Мамлекеттик-жеке өнөктөштүк борборунун инвестициялык портфелинин суммасы миллиард сомдон ашканын кошумчалады.
