Мамытов: ЕАЭБдин Евразия аркылуу соода потенциалы абдан күчтүү
© Sputnik / Асель Сыдыкова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов ЕАЭБдин ресурстук жана географиялык мүмкүнчүлүктөрү эбегейсиз экенин айтты.
Евразия экономикалык биримдиги түзүлгөн 10 жылда өзүнүн туруктуу уюм экенин көрсөтө алды. Батыштын Россияга салган санкциялары уюмдун туруктуулугун сынаса, коронавирустук пандемия уюмга мүчө өлкөлөрдүн уюшкандыгын байкап көргөндөй болду. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Мамытов: ЕАЭБдин Евразия аркылуу соода потенциалы абдан күчтүү
Анын айтымында, уюмга мүчө мамлекеттердин ИДПсы 10 жыл аралыгында 34-35 пайызга өскөн.
"ЕАЭБ географиялык жактан абдан ыңгайлуу жайгашкан, табигый ресуртарга бай уюм. Муну Кытай да жакшы түшүнүп, учурда ЕАЭБ менен соода алакасын күчөтүү боюнча тыгыз иштеп жатат. Ошондой эле ЕАЭБ өзү да Азия өлкөлөрүнө соода алакасын ачып, позициясын бекемдөөдө. Бул Батыш жана АКШ үчүн чындыгында экономикалык чоң сокку десек болот. Анткени мындан 100 жыл мурда эле англиялыктар өздөрү Евразиянын борборун ким колуна алса, дүйнө ошонуку болот деп айткан эле. ЕАЭБ азыр дал ушул Евразиянын чок ортосунда турган экономикалык уюм. Баары экономикадан башталарын жакшы билебиз. Мамлекеттер да алгач экономикалык алакасын бекемдеген соң гана саясий мамилеге өтүшөт. Россияга Батыштын салган түрдүү санкцияларына карабай уюмдун жалпы көрсөткүчтөрүнүн жогорулап жаткандыгы анын туруктуулугун билдирет. Дагы бир кызык жагдай, уюмга мүчө Кыргызстан, Казакстан, Армения сыяктуу өлкөлөргө ушул санкциялардан улам ички экономикасын көтөрүп алууга жакшы шарттар түзүлүп жатат. Россиялык ири ишканалар келип, завод, фабрикаларды ачып өлкөнүн ИДПсына зор салым кошууда. Муну биз Армениянын эле мисалынан көрсөк болот", — деди Мамытов.
Ал Кытай, Индия сыяктуу ири мамлекеттер ЕАЭБ менен соода алакасын күчөтүп, альтернативдик соода жолдорун курууга ынтызарланып жатканы уюмдун келечекте чоң күчкө айланарынан кабар берерин кошумчалады.
