Желектин автору: азыр сунушталып жаткан туу мен көргөн эң начар вариант
12:05 04.10.2023 (Жаңыртылды: 12:06 04.10.2023)
© Sputnik / Табылды Кадырбеков
Жазылуу
КР эл сүрөтчүсү, мамлекеттик желектин авторлорунун бири Бекбосун Жайчыбеков желектин ортосунда жайгашкан күн нурунун формасын өзгөртүү боюнча пикирин айтты.
Кыргыз Республикасы Советтер Союзунан бөлүнүп, эгемендүү мамлекет болгондон кийин туу, герб, гимнин бекитүү үчүн конкурс жарыяланган. Ошондо чыгармачыл адамдардын Жогорку Кеңештин залында бир жумага жакын туунун көргөзмөсү өттү. Депутаттар авторлор менен чогуу идеясын ортого салып отуруп, 600-700 талапкердин ичинен биздин туунун эскизин жактырышкан. Бул тууралуу Бекбосун Жайчыбеков Sputnik Кыргызстан радиосунун эфиринде маек куруп жатып билдирди.
Желектин автору: азыр сунушталып жаткан туу мен көргөн эӊ начар вариант
Анын айтымында, желек авторлор берген эталондо колдонулса күн карамага окшошмок эмес.
"Ал кездеги легендарлуу, мыкты парламенттин депутаттарынын жакшы да, жаман да пикирлерин уктук. Адегенде биз желектин өӊүн ар түрдүү (кызыл, көгүлтүр, ак, жашыл ж.б.) кылып даярдап келгенбиз. Түндүгү башкача, күндүн нурларынын түз болгону да бар болчу. Уйгакка окшошуп калбасын деп азыркы вариантка токтолдук. "Манас" эпосуна кайрылып атып кызыл түстү тандап алдык. Кийин биз нечен жолу Жогорку Кеӊештин мурдагы, кийинки депутаттарына кайрылып, мамлекеттин символу болгон желекти колдонуу көзөмөлдөнсө деп айтып жүрдүк. Себеби биз даярдап берген желек кээде кыйшык, жалпайып, түндүгү өзгөртүлүп, тикчийтип, күн карамага окшошуп, айтор, ар ким каалагандай чыгарып колдонулуп келди. Эгер биз тарткандай эталондо чыгарылса күн карамага деле окшошпойт. Биз бекер, жөн эле кеӊешчи болуп, өзүбүз көзөмөлдөп береличи деп кайрылдык. "Ии, ооба, баары укмуш болот" деп коюшат да, бүттү. Эч качан эринген эмеспиз. Дагы деле жараткан эмгектин үстүнөн иштегенге даярбыз. Азыр эми желектин ортосунда жайгашкан күн нурунун формасын өзгөртүү сунушталды. Авторлор каршы чыккан деле жокпуз. Албетте, ушунчалык эле эл жапырт талап кылса өзгөртсө болот. Бирок азыркы сунушталып жаткан желек — мен көргөн эӊ начар вариант. Жакында эле Жогорку Кеӊешке барып сүйлөштүк. Өзүӊ жараткан эмгек жан дүйнөӊдөн орун алып, балаӊдай эле болуп калат экен. Жүрөк тартпай, өйүп туруп алды. Анын үстүнөн дагы иштейбиз. Бирок бул чоӊ трагедия эмес деп айтат элем. Биз башында сунуштаган вариант ушундай болчу. Болгону өтө эле начар берилип калыптыр", — деди Жайчыбеков.
Ал мамлекеттик туунун жаратуучулары желектин авторлору катары азыркыга чейин эч кандай документ алышпаганын кошумчалады.
