Садыкулова: мен иштебей калсам "Нуска" жабылып калчудай сезилет
© Sputnik / Асел Акмат
Жазылуу
"Нуска" китеп борборунун жетекчиси Анаркан Садыкулова аталган дүкөндүн келечегине тынчсызданарын айтты.
"Нуска" китеп борборунун жетекчиси да, пол жуугучу да, сатуучусу да өзүммүн. Бул тууралуу Анаркан Садыкулова Sputnik Кыргызстан радиосуна маек куруп жатып билдирди.
Садыкулова: мен иштебей калсам "Нуска" жабылып калчудай сезилет
Анын айтымында, аталган китеп борбор түзүлгөндөн берки 25 жыл аралыгында анын имаратына кызыккандар көп болгон.
"Нуска" китеп борборун менчиктештирүү доорунда жеке демилгем менен чуркап жүрүп түптөгөм. 1996-жылы ага чейин китептер сатылган борбор жеке менчикке өтүп кетти. Көптөгөн кызматкерлер жумушсуз калды, канчалык жаптырбаганга аракет кылганыбыз менен ошол кездеги бийликке күчүбүз жеткен жок. Бирок мен өзүм эки жылдан соң, 1998-жылы чуркап жүрүп, бардык тиешелүү мекемелерге кат жазып, азыркы "Нуска" китеп дүкөнүн ачтым. Кыргыз энциклопедиясында иштеген балдар текчелерди жасап берди, өзүм актап-сырдап кыргыз тилинде китептер сатыла турган дүкөн кылып койдук. Союз учурунда ачылган кыргыз китептери сатылган дүкөнгө ага чейин эле жазуучу Түмөнбай Байзаков "Нуска" деп ат ыйгарган болчу. Ошол ысымын эле калтырдык. Кайра куруу доору болуп, эл китеп эмес нанга акча таппай калган заманда китеп борборун кармап туруу оор болду. Анын имаратын алып башка нерсеге колдонгусу келгендердин аягы ушул күнгө чейин тыйылбай келет. Кимдир бирөөлөр бул имарат алынат деп кат жолдоп калганда мен авторлорго китептерин алып кетүүсүн айтып чалып чыгам. Алар нааразычылыгын билдирип, жабылбашы керектигин айтат. Ошентип чуу көтөрүлөт. Имаратка кызыккандар баш тартат, китеп дүкөн ордунда калып ишин уланат. 25 жылдык тарыхында мына ушинтип эле жашап келе жатабыз. Кыргыз адабиятын, маданиятын көтөрүү, сактоо, уюткулуу бир жайга айлантуу максатында ачылган "Нуска" китеп борбору менден кийин жабылып калчудай сезилет", — деди Садыкулова.
Ал китеп борборго каржылык жардам көрсөтүп, керектүү буюм-тайымдарын тартуулап турган окурмандар да жок эместигин кошумчалады.
