ОСАГО полисин Кыргызстанда канчага алууга болот? Калькулятор
12:37 11.01.2023 (Жаңыртылды: 12:43 11.01.2023)
© Sputnik / Григорий Сысоев
Жазылуу
Ушул жылдын 1-апрелинен тарта өлкөдөгү айдоочулар Автоунаа ээлеринин жарандык-укуктук жоопкерчилигин милдеттүү камсыздандыруу (ОСАГО) полиси жок болсо айып төлөйт.
Sputnik Кыргызстан агенттиги полис алчулар үчүн атайын калькулятор жасап чыкты. Анын жардамы менен айдоочулар тажрыйбасына, автоунаанын кыймылдаткычынын көлөмүнө жараша баасын эсептеп алса болот.
Финансы рыногун жөнгө салуу жана көзөмөлдөө мамлекеттик кызматынын маалыматына ылайык, ал камсыздандыруу полисинин базалык ставкасы 1 680 сом турат. Ал документти жеке тараптар 1-апрелге чейин албаса 3000 сом, юридикалык тараптар 13 миң сом айыпка жыгылат.
ОСАГО баасы коэффициенттер менен эсептелип, анда автоунаанын түрү, айдоочунун жашы, тажрыйбасы, жол кырсыгына кабылган-кабылбаганы, техникалык кароодон өткөндүгү жана буга чейин алган полистин мөөнөтү эске алынат.
Автоунаанын түрүнө жараша ОСАГО канча сом болот?
Кыймылдаткычынын көлөмү 2000 куб сантиметрден аз болгон жеңил автотранспорт каражаттары жана электр кыймылдаткычынын кубаттуулугу 50 кВт/саатка чейин болгон электромобилдерге 1,0 коэффициенти;
Кыймылдаткычынын көлөмү 2001ден 3000 куб сантиметр болгон жеңил автотранспорт каражаттары жана электр кыймылдаткычынын кубаттуулугу 51 кВт/сааттан жогору болгон электромобилдерге 1,20 коэффициенти;
Кыймылдаткычынын көлөмү 3001 куб сантиметрден жогору болгон жеңил автотранспорт каражаттарына 1,45 коэффициенти;
Жалпы уруксат берилген максималдуу салмагы 12 тоннадан аз жүк ташуучу автотранспорт каражаттарына 1,60 коэффициенти;
Жалпы уруксат берилген максималдуу салмагы 12 тоннадан ашык жүк ташуучу автотранспорт каражаттарына 2,00 коэффициенти;
16га чейин орундугу бар автобустарга 1,45 коэффициенти;
16дан ашык орундугу бар автобустарга 1,65 коэффициенти;
Троллейбустарга 0,8 коэффициенти;
Мототранспорт, трактор, экскаватор, бульдозерлерге 0,45 коэффициенти колдонулат.
Ошондой эле айдоочунун жашы, тажрыйбасы да эске алынат. Автоунаа ээси канчалык жаш жана тажрыйбасы аз болсо, ошончо көп акча төлөйт.
Айдоочу 25 жашка чейин куракта болуп, 3 жылга чейин айдоо стажы болсо — 1,4 коэффициенти;
25 жашка чейин, 3 жылдан ашык айдоо стажы болсо — 1,3 коэффициенти;
Жашы 25тен өтүп, айдоо стажы 3 жылга чейин болсо — 1,2 коэффициенти;
Жашы 25тен өтүп, айдоо стажы 3 жылдан ашык болсо — 1 коэффициенти пайдаланылып эсептелет.
Ал эми бир эле унааны бир нече адам айдай турган болсо да полистин баасы жогорулайт.
Эгер автоунаа чет өлкөдө катталган болсо, полис 2,2 коэффициенти менен эсептелет.
Ошондой эле айдоочу буга чейин жол эрежесин бузбай, кырсыктабаган болсо, кийин полисин арзан алып турат.
Андан сырткары, ОСАГО алууда автотранспорт каражатынын диагностикалык карта алган-албаганы да эске алынат. Мисалы, диагностикалык картасы жоктор полисти кымбатыраак алат.
ОСАГО жарандардын күнүмдүк жашоосуна кандай таасир этет?
Полиси бар адам жол кырсыгынан каза болуп калса — 300 миң сом;
I топтогу майып болуп калса — 200 миң сом;
II топтогу майып болуп калса — 150 миң сом;
III топтогу майып болуп калса — 100 миң сом;
Бала майып болуп калса, 200 миң сом берилет;
Жаракат алып, ден соолугуна залака тийип калган учурда жабырлануучунун амбулатордук, стационардык дарыланууга кеткен чыгымы төлөнөт. Бирок 100 миң сомго чейинкиси гана.
Ал эми полиси бар автоунаа кырсыктаса 150 миң сомго чейин төлөнөт.
