Экономика министрлиги бюджетти 400 млрд. сомго жеткирүү жолдорун атады
Жазылуу
Белгиленген иш-чаралар 2022-жылга пландалган долбоордун негизин түзгөн.
БИШКЕК, 28-фев. — Sputnik. Экономика жана коммерция министрлигинин ишмердүүлүгү ишкердик үчүн жагымдуу шарттарды андан ары кеңейтүүгө багытталат. Ошондой эле тармактарда инфраструктуралык жана инвестициялык долбоорлорду ишке ашыруу боюнча жумуштар улантылат. Бул тууралуу ведомствонун маалымат кызматы билдирди.
Анда бизнести колдоо үчүн “Өнүгүү үчүн капитал” деген жеңилдетилген кредит берүү боюнча мамлекеттик программа иштелип чыгары, ошондой эле өзбек-кыргыз жана венгер-кыргыз өнүктүрүү фонддорунун иши жанданары белгиленди.
Мындан тышкары, “Жашыл” финансылык корпорация түзүү каралууда.
“Салыктык жол-жоболорду толук автоматташтыруу (фискалдаштыруу) аяктайт, бул салык салуу базасын кеңейтет жана ошого жараша бюджеттин кирешелерин көбөйтөт. Бул жалпысынан 2022-жылы консолидацияланган бюджеттин ресурстук бөлүгүнүн 400 миллиард сомго чейинки көрсөткүчүнө жетишүүгө чоң салым кошот”, — деп айтылат билдирүүдө.
Төмөнкү багыттар боюнча иштер күчөтүлөт:
ЕЭК менен жаңы электромобилдерди бажы алымдарысыз ташып келүү мөөнөтүн 2025-жылга чейин узартуу маселесин иштеп чыгуу;
Мамлекеттик автопаркты электромобилдерге өткөрүү программасын иштеп чыгуу;
“Региондук экономикалык өнүктүрүү – 2” долбоорунун алкагында Баткен облусунда айыл чарба продукциясын өндүрүүнү көбөйтүү, негизги муниципалдык кызматтарды жакшыртуу жана кичи, орто бизнестин ишмердүүлүгүн кеңейтүү аркылуу региондук экономиканы өнүктүрүүгө көмөктөшүү;
2022–2025-жылдарга электрондук коммерцияны колдоо жана өнүктүрүү программасын иштеп чыгуу;
2023-2026-жылдарга “Кыргызстанда жасалган” Улуттук экспорттук программасынын долбоорун иштеп чыгуу жана кабыл алуу;
“Ками-Моторс” ААК өндүрүштүк базасында коммерциялык электромобилдерди чыгаруу ишке киргизилет. “Камаз” ЖАКсы менен биргеликте Кыргызстанда жүргүнчүлөрдү ташуучу автобустарды (газ мотору менен) жана электробустарды чогултуу өндүрүшү уюштурулат;
“Кыргыз Текстиль ЛТД” ЖЧКсы Ош шаарындагы текстиль жана тигүү өндүрүшү боюнча индустриалдык парктын аймагында 2022-жылдын биринчи кварталында эки тигүү ишканасын ачуу иштери улантылат.
Жалпысынан ушул жана башка тиешелүү иш-чаралар 2022-жылга пландын долбоорунун негизин түзгөн.
