Кожобеков: эми ОшМУнун студенттери Россиянын да дипломуна ээ болот
© Sputnik / Асель Сыдыкова
Жазылуу
Ош мамлекеттик университетинин ректору Кудайберди Кожобеков аталган окуу жайдын Россиянын ЖОЖдору менен байланышы бекемделип жатканын белгиледи.
Россиянын айрым окуу жайлары менен ОшМУнун ортосунда кош диплом берүү макулдашылды. Бул тууралуу Кудайберди Кожобеков Sputnik Кыргызстан радиосунда маек куруп жатып билдирди.
Кожобеков: эми ОшМУнун студенттери Россиянын да дипломуна ээ болот
Анын айтымында, эми Ош МУнун студенттери Челябинскидеги Түштүк Урал мамлекеттик университетинин дипломуна ээ болууга мүмкүндүк алышат.
"2020-жылы Челябинскидеги Түштүк Урал мамлекеттик университети менен ОшМУнун ортосунда биргелешкен кыргыз-орус факультети ачылган. Анын алкагында беш багыт боюнча кош диплом берүү программасы башталган. Ошол программа менен окугандар учурда экинчи курсту аяктоо алдында турушат. Ал эми үчүнчү курстан баштап алар окуусун Түштүк Урал мамлекеттик университетинде улантышы керек. Натыйжада программанын катышуучулары ОшМУнун жана Түштүк Урал мамлекеттик университетинин дипломдоруна ээ болушмак. Мына ошол боюнча жакында Челябинск шаарына барып аталган окуу жайдын жетекчилиги менен жолугушуп, сүйлөшүүлөрдү жүргүздүк. Мындан тышкары, Челябинск, Екатеринбург шаарларындагы бир катар жогорку окуу жайлардын жетекчилиги менен жолугуштук. Алар менен кызматташтыкты бекемдөө жаатында меморандумдар бар. Анын алкагында Ош МУнун студенттери академиялык мобилдүүлүктө окушууда. Ошондой эле Екатеринбургдагы Урал медициналык университетине кош диплом программасы аркылуу дарылоо, стоматология адистиги боюнча 25 студент кабыл алынган. Алар эки ЖОЖдун студенти болуп эсептелет. Мына ушул багытта кызматташтыкты улантуу боюнча сүйлөшүүлөр болду", — деди Кожобеков.
Ошондой эле ал аталган университеттер менен педагогдордун тажрыйба алмашуусуна мүмкүндүк түзүлгөнүн кошумчалады.
