Абдураимов: токтоп калган ишканалардын ишин жандантуу пландалууда
© Sputnik / Асель Сыдыкова
Жазылуу
"Кыргызиндустрия" ААКнын президенти Жарасул Абдураимов аталган ишкана өлкөдөгү өндүрүштү жөнгө салуу үчүн түзүлгөнүн белгиледи.
Учурунда токтоп калган ишканаларды кайра жандандыруу максатталууда. Ал үчүн 100 пайыз мамлекеттик үлүшү менен атайын ишкана түзүлдү. Бул тууралуу Жарасул Абдураимов Sputnik Кыргызстан радиосунда маек куруп жатып билдирди.
Абдураимов: токтоп калган ишканалардын ишин жандантуу пландалууда
Анын айтымында, эгемендүүлүк алгандан кийин өлкөдө өндүрүш тармагы объективдүү жана субъективдүү себептерден улам токтоп калган.
"90-жылдары өлкөдөгү көптөгөн ишканалар менчиктештирилип, ар кандай себептер менен ишмердүүлүгүн уланта албай токтоп калган. Алардын айрымдары союздун учурунда аскер куралдарын жасаган заводдор эле. Ошолордун иши союз учурундагы кооперация жок токтоп калган. Кээ бир ишканалар менчиктештирген жетекчилиги, жамаатынын жөндөмсүздүгүнөн улам ишин уланта алган эмес. Башкалары базар экономикасына ыңгайлаша албай калды. Мына ошолордун имараттары, жабдыктары турат. Аларды кайрадан жандандыруу, өндүрүштү жолго салуу максатында министрлер кабинетинин алдында "Кыргызиндустрия" ачык акционердик коому түзүлдү. Ага чейин эле адистер менен программалар түзүлүп калган. Учурда 30дан ашуун долбоор бар. Келечекте 140ка чукул долбоорлорду иштеп чыгуу максатталууда. Алардын көбү өлкөнүн кен байлыктарына ылайыкталган ишканалар болору мерчемделүүдө. Учурда технологиянын өнүккөнүн эске алып, заманбап жабдыктарды алып келүү менен жергиликтүү өндүрүштү жанданткан программалар түзүлүүдө. Муну менен өлкөнүн импорттон көз карандылыгын азайтуу пландалып жатат", — деди Абдураимов.
Ошондой эле ал аталган ишкананын уставдык капиталы бир миллиард сом экенин кошумчалады.
