Остеопат: атлант омурткасынын чыгып кетиши мүмкүн эмес
10:33 03.12.2021 (Жаңыртылды: 14:27 14.12.2021)
© Sputnik / Асель Сыдыкова
Жазылуу
Остеопат Таварик Сыдыков атлант омурткасынын жайгашышы жана анын организмдеги ролун түшүндүрүп берди.
Соңку учурларда атлантты түздөп коюу менен эле көптөгөн оорулардан айыгып кетүү мүмкүндүгү тууралуу маалыматтар тарай баштады. Бул мүмкүн эмес. Мындай пикирин Таварик Сыдыков Sputnik Кыргызстан радиосунда маек куруп жатып билдирди.
Остеопад: атлант омурткасынын чыгып кетиши мүмкүн эмес
Анын айтымында, атлант медицинада жүлүндүн биринчи омурткасы катары эсептелет.
"Атлант — бул биринчи моюн омурткасы, ал башты кармап турат. Башка омурткалардан айырмаланып анын түзүлүшү шакек түрүндө. Астыңкы, арткы шакектери жана капталдарында массалары бар. Ушул капталдарындагы массаларында үстүңкү жана астыңкы муун аянтчалары жайгашкан. Үстүңкү аянтчасы менен желке сөөгүнө, ал эми астыңкы муун аянтчасы менен жүлүндүн экинчи омурткасына туташкан. Атлант желке сөөгү менен бириккен жери эңкейүү жана чалкалоо кыймылдарын аткарат. Ал эми башты капталга бурганга жүлүндүн экинчи омурткасы менен тутушкан жери жооп берет. Бул, демек, атлант тарамыштар жана булчуңдар капталып турат дегенди түшүндүрөт. Андыктан аны кол менен басуу аркылуу эле калыбына келтирип коюу дээрлик мүмкүн эмес. Ошондой эле анын ордунан жылып же чыгып кетиши жылдар бою билинбей жүрө бербейт. Жүлүн менен байланышта болгондуктан эгер чыгып кетип же кысылып калган болсо, адамдын кыймылында өзгөрүүлөр байкалып, ал тургай майыптыкка алып келет", — деди Сыдыков.
Дарыгер атланттын ордунан жылып кеткенин билүү үчүн сөзсүз түрдө анын ар тарабынан тартылган компьютердик томография талап кылынарын кошумчалады.
