БИШКЕК, 29-сен. — Sputnik. Жогорку Кеңештин депутаты Осмон Турдумамбетов кызматынан кетип жаткан Улуттук банктын төрагасы Толкунбек Абдыгуловдон финансылык технология боюнча мыйзам долбоору тууралуу пикирин сурады.
Аталган демилгени депутаттар Самат Ибраев менен Бактыбек Турусбеков сунуштап, финансылык технология боюнча мыйзам долбоорун демилгелеген. Документте Улуттук банкты көз карандысыздыгынан ажыратуу сунушталган. Буга башкы банк каршы чыккан. Ал ортодо депутат Абдыгуловдун дарегине бир катар сын айткан.
Турдумамбетов: "Лобби кылып жаткан мыйзам долбоору мамлекетке жана Улуттук банкка кандай кооптуулук жаратат?" - деп сурады.
"Бул жерде биринчи кезекте түшүнүктү алмаштырып жатышат. Финансылык технология деген атка жамынып, чынында ага тиешеси жок система түртмөлөнүүдө. Дүйнөнүн бир дагы өлкөсүндө Улуттук банктын сактоочу жайын жеке компания колдонот деген прецедент жок. Экинчиден, Улуттук банк эсеп ачып жеке ишканаларды тейлеши керек деген мыйзам да дүйнөдө жок. Мунун баары Улуттук банк жана өлкө үчүн өтө кооптуу", — деди Абдыгулов.
Ошондой эле ал жаңы келе турган жетекчи Кубанычбек Бөкөнтаевдин Улуттук банктын азыркы позициясын мындан ары да коргоп аларына үмүт артты.
