БИШКЕК, 23-авг. — Sputnik. АКШ президенти Жо Байден Афганистан боюнча туура чечим кабыл алгам деп эсептейт. Өлкө башчынын сөзүн РИА Новости жазды.
Маалыматка караганда, АКШда Афганистандагы кырдаал боюнча сурамжылоо жүргүзүлүп, анда америкалыктардын көбү Афганистанда болуп жаткан абалга терс көз карашта экенин айтышкан. Журналисттер сурамжылоого карата Байдендин пикирине кызыгышкан.
"Менин жумушум эч ким жасай албаган же жасабаган нерсе боюнча чечим чыгаруу. Жаш балдарды, кыз-келиндерди мындан ары согушка жибергенди токтотуу боюнча туура чечим кабыл алдым", — деди Байден.
Бул чечимин түшүндүрүп жатып ал чөнтөгүнөн кагаз алып чыккан. Анда согушта көз жумгандардын саны жазылганын айткан.
"Бул карточка дайыма жанымда. Анда каза болгон, жабыркагандар тууралуу маалымат бар. Американын 2 448 жараны каза болсо, 20 722си жабыркаган", — деди ал.
Байден Ирак менен Афганистанда каза болгон америкалык аскерлер тууралуу маалымат жазылган баракты дайыма алып жүрөрүн буга чейин да бир нече ирет айткан. Ал аскерлердин бейкүнөө өлүмүн токтотуу керектигин айтып, ошол себептен армияны Афганистандан алып чыгуу чечимин кабыл алганын белгилеген.
Афганистандагы кырдаал
16-августка караган түнү "Талибандын"* өкүлү Мухаммед Наим 20 жылга созулган согуш аяктаганын, жакында мамлекетте жаңы башкаруу формасы киргизилерин билдирди.
Ал арада Панджшер аймагы талибдерге каршылык көрсөткөнү айтылып, вице-президент Амрулла Салех өлкөнүн убактылуу президенти экенин билдиргени айтылды.
"Талибан"* — Кыргызстанда жана башка мамлекеттерде диний-экстремисттик уюм катары тыюу салынган кыймыл болуп саналат.
