БИШКЕК, 21-июл. — Sputnik. Президент Садыр Жапаров министрлер кабинетине өлкө аймактарында табигый кырсыктарды алдын алуу боюнча иш-чаралар комплексин күчөтүүнү тапшырды. Бул туурасында мамлекет башчынын маалымат кызматынан кабарлашты.
"Жапаров табигый кырсыктын кесепетинен каза болгондор менен жабыр тарткандардын үй-бүлөсүнө терең кайгыруу менен көңүл айтып, жабыр тарткандарга мамлекет тарабынан тиешелүү колдоо көрсөтүлөрү белгиленди", — деп айтылган таратылган маалыматта.
Эске салсак, кечээ Сузак районун бир нече айылында сел жүрүп, анын кесепетинен алты жаштагы кыз сууга агып, каза тапты.
Жапаров ар кандай табигый кырсыктар: сел, жер көчкү, суу ташкыны ыктымалдыгы жогорулап жаткандыгына байланыштуу ишке тартылган мамлекеттик органдардын, тиешелүү кызматтардын жогорку даярдыкта иштөө тартибине өтүшү керектигин белгилеген.
Муну менен катар министрлер кабинетине Жалал-Абад жана Баткен облустарындагы селдин кесепеттерин жоюу иштерин активдештирүү тапшырылган.
Акыркы күндөрү Кыргызстандын аймагында сел жана суу ташкындары болуп, бир нече адамдын өмүрүн алып кетип жатат.
