Кечээ, 19-июлда, кечке жуук катуу жаап өткөн жамгырдын кесепетинен райондогу Катраң айыл аймагынын Козу-Баглан, Катраң айылдарында, Лейлек айыл аймагынын Лейлек айылында, Тогуз-Булак айыл аймагынын Тогуз-Булак, Айкөл айылдарында жана Исфана шаарынын Голбо, Чымген айылдарында сел жүргөн. Ак-Терек айылында 25 турак үй, бир мектеп, бир бала бакча жана бир мечиттин короосу, ички чарбалык унаа жолдор жабыркаган. ӨКМ алгач селдин кесепетинен 16 жаштагы бала көз жумганын айтып, андан кийин ал суу ташкындан качып баратып жүрөгү кармап көз жумганын билдирген.
"Бүгүн жеринде селдин кесепеттерин жоюу жана тактоо иштерин жүргүзүү үчүн райондук жарандык коргонуу комиссиясы, ӨКМдин кризистик кырдаалдарда башкаруу борборунун, Баткен облустук башкармалыгынын ыкчам топтору жана жалпы 47 куткаруучу тартылды", — деп жазылган маалыматта.
Мындан сырткары, жергиликтүү тургундары кол кабыш кылып, кошумча инженердик техникалар тартылууда.
