"Электр станциялары" ишканасынын маалымат катчысы Тагжан Айдаралиева ЖЭБде жылытуучу шаймандар капиталдык оңдоодон өтүп жаткандыгын айтты. Июнь айына чейин куурдагы жана блоктордогу клапандар, түз жана кайра келүүчү түтүктөрдөгү дренаждар, аккумулятор бактарын бошотуу жана толтуруу үчүн жөнгө салгычтар оңдолот. 10 миң куб чарчы метрлик көлөмдүү бактар да бир сыйра текшерүүдөн өтөт. Мындан тышкары, коммерциялык эсепти өлчөөчү шаймандар "Кыргызстандартка" текшерүү үчүн жөнөтүлүп, керектөөчүлөргө ысык сууну июнь айынан кечиктирбестен жеткирүү үчүн көптөгөн дагы башка иштер жүргүзүлөт. Бардык жумуштар аяктагандан кийин адистер жылытуучу шаймандардын түтүктөрүн жана арматураларын гидравликалык сыноодон өткөрүшөт.
Буга чейин "Бишкек жылуулук тармагы" баш калаанын жашоочуларына авариялык кырдаалдардын алдын алуу үчүн жылытуучу шаймандарына профилактикалык оңдоолорду жүргүзүүнү сунуштады.
