БИШКЕК, 21-дек. — Sputnik. ЕАЭБ товар өндүрүү боюнча Индиянын тажрыйбасын колдонсо болот. Бул тууралуу Кыргызстандын аталган өлкөдөгү элчиси Асеин Исаев билдирди.
Ал ЕАЭБ мамлекеттери менен Индиянын ортосундагы соода-экономикалык кызматташтыкты өнүктүрүү темасына арналган конференцияга катышкан.
"Пандемияга байланыштуу бизде Индияда өндүрүлгөн фармакологиялык товарларга суроо-талап өстү. Биздин оюбузча, биримдикке кирген өлкөлөр Индиянын тажрыйбасын алса жакшы болчудай. Индия өзүн дүйнөлүк дарыкана катары жакшы көрсөтө алды", — деди элчи.
Анын сөзүн ЕАЭБдин Фармацевтикалык ассоциациясынын башкармалыгынын төрагасы Станислав Наумов кубаттады. Төраганын айтымында, ЕАЭБдин аймагында дары-дармек өндүрүү маселесин карап көрүү керек.
"Мен кыргызстандык кесиптешимдин пикирин колдойм. Мындай долбоорлорду ишке ашыруу үчүн бир гана Россиянын аймагында эмес, башка мамлекеттерде деле аракет кылсак болот", — деди ал.
Буга чейин элчи Индия Кыргызстандан чыккан кандай товарларга муктаж экенин айтып берген.
