БИШКЕК, 5-окт. — Sputnik. Интернеттин кыргыз сегментине митингде жүргөн эл менен аралаша баскан атайын формачан адамдардын видеосу тарады. Видео "Короче" Telegram-каналына дагы жүктөлдү.
Анда бир адам спецназ аскерлери элге кошулуп кеткенин айтат. Кадрлар кыргызстандыктарга мессенджерлер аркылуу кеңири тарап, талкуу жаратууда.
Дал ушул видео тартылып жаткан учурда Sputnik Кыргызстан агенттигинин ошол жерде болгон кабарчысы окуянын чоо-жайын айтып берди.
Окуя Чүй проспектиси менен Тыныстанов көчөсүнүн кесилишиндеги Экономика министрлигинин имаратынын жанында болгон. Анда митингчилер атайын формачан турган милиция кызматкерлеринин жанына барып "эч ким аларга кол салбай турганын, ал жактагылардын бардыгы Кыргызстандын жарандары экенин" айткан. Ошол ирмемдерде күч органдары менен митингчилер кол алышып жаткан учур видеого тартылып калган.
Маалыматты расмий тастыктоо үчүн Бишкек милициясынын маалымат кызматына кайрылдык, алар маалыматты тактап жатканын айтышты.
Эске салсак, Бишкек шаарынын борбордук бөлүгүндө парламенттик шайлоонун жыйынтыгына нааразы болгон эл митингге чыккан. Милиция аларга каршылык көрсөтүүдө.
