БИШКЕК, 5-окт. — Sputnik. Күч органдарынын кызматкерлери митингчилерди "Ала-Тоо" аянтынан дээрлик сүрүп чыгарып, Ак үйдүн жанын ээледи.
Элди качыруу үчүн кулак тундуруучу каражаттар жардырылып, көздөн жаш агызган газ чачылууда.
Качкан митингчилердин арты Киев көчөсү, Эркиндик проспектилерин бойлой жөнөсө, алды ЦУМ (чыгыш тараптан), Исанов менен Чүй көчөлөрүнүн кесилиштерине (батыш тараптан) чейин жетишти.
Эске салсак, бүгүн түшкө чейин "Ала-Тоо" аянтында акырындан эл топтолуп, түштөн кийин шайлоодон утулуп калган сегиз партиянын башын бириктирген ири митингге айланган. Алар 4-октябрь күнү өткөн парламенттик шайлоонун жыйынтыгын тааныбай турганын айтып, адилеттүүлүктү талап кылууда.
