Министрдин орун басары пневмония менен көп адам ооруп, кошумча ачылган орундар бат эле толуп калып жатканын айтты.
БИШКЕК, 1-июл. — Sputnik. "Манас" аэропортунун жанындагы Американын мурдагы "Ганси" авиабазасынын аймагында бейтаптарды кабыл алуу үчүн 600 орун уюштурулду. Бул туурасында саламаттык сактоо министринин орун басары Мадамин Каратаев эртең мененки брифингде билдирген.
Ошону менен бирге эле Каратаев айрым бейтаптар "Гансиде" дарылануудан баш тартып жатканын айтып, бирок ал жакта бүт шарттар түзүлгөнүн белгилеп өттү
Анын айтымында, бул жерге пневмонияга чалдыгып, абалы орточо деп бааланган бейтаптар жаткырылат. Буга чейин 200 орун ачылып, бүгүн эртең мененкиге чейин 130 адам кабыл алынган. Ал эми бүгүн кошумча дагы 400 орун даярдалды.
Ошону менен бирге эле Каратаев айрым бейтаптар "Гансиде" дарылануудан баш тартып жатканын айтып, бирок ал жакта бүт шарттар түзүлгөнүн белгилеп өттү.
"Абалы орточо бейтаптарды "Гансиге" которолу десек, "жок, андан көрө үйдөн дарыланам" деп баш тарткандар болууда. Буга жолдун алыстыгын жана шарттардын жоктугу себеп экенин айтышууда. Мен ал жерде шарттар түзүлгөнүн белгилеп кетейин. Бир палатада эки гана керебет, өзүнчө душ, ажатканасы бар. Ал эми медициналык жабдуулар менен дарыгерлердин жетишпей жатканы боюнча маселе бар", — деди Каратаев.
Мындан улам Sputnik Кыргызстан Саламаттык сактоо министрлигинин маалымат кызматынан аталган жайдын сүрөттөрүн алды.
Андан сырткары, Каратаев пневмония менен көп адам ооруп кошумча ачылган орундар бат эле толуп калып жатканын айтты.
"Кечээ №1 шаардык клиникалык оорукананын хирургиялык корпусунда 170 орун ачылган. Ал жети сааттын ичинде эле толуп калды. Бүгүн Дайыр Асанов атындагы улуттук аскер лицейинин жатаканасынан дагы 150 орун даярдалат", — деди министрдин орун басары.
Ошондой эле ал өкмөт тарабынан 750 кошумча орун даярдоо тапшырмасы берилгенин кошумчалады.
